నేను-నారాయణ

పంచేంద్రియాలన్నీ.. పంచకట్టులో కట్టి..
పార్టీకి రాసిస్తి నారాయణ..
నాకులపొడే గొప్పోడు..
నా నాయకుడు ఒక్కడే నారాయణ..
వాడేను రామయ్య. నేనేమో హనుమయ్య..
నావంటూ నిర్ణయాలు తీస్కోను నారాయణ..
నడిపేది వాడాయే.. నడిచేది నేనాయే
నడిమిట్ల నువ్వేడా నారాయణ..
దూకమంటే దూకుతాను.. ఈత రాకున్నాను..
మా అయ్యోరు మాటాయే నారాయణ..
అతగాడు మార్గదర్శి.. నేనేమో బాటసారి.
నిదర్శనం నీవాయె నారాయణ..
ఎవడైనా ఎదిరిస్తే అంతునేను చూస్తాను..
నావంతు చూసేది మటుకు నువ్వే నారాయణ..
పొలాలు చెరూలు పోయి గోల్ఫ్ మైదానాలు రానియ్యి
మా అయ్యకు చూపు మందం నారాయణ.
నా కట్టె కాలెదాకా రాజు గారి జాగీరు..
నేనవుతా ఆరి పాలేరు నారాయణ..
ఇట్టాగే ఉండనివ్వి... మా పేపరే చదవనియ్యి..
బడికెట్టాగు రేకు లేదు నారాయణ..
దొరబాబు వాడి బాబు  రానియ్యి..
రాచరికం పెజలె ఇవ్వనియ్యి నారాయణ.

--శరత్చంద్ర

విలువేలేని మమత

ఎన్నో ఉన్నా అన్నీ నువ్వే అనుకున్నా..
ఎంతో కాలం నీవై నేను బ్రతికున్నా..

నీ కనులకు మనసుకు చేరువలేనా!
నీ కాంక్షకు మీమాంసకు చేరలేదా!!
http://raatalu.blogspot.in

చెరలోనా ఉంచేసి చర్రున ఎగిరావా!
ఆశల్లో ముంచేసి అమాంతం విడిచావా!
గతమంతా చిదిమేసి కనుమరుగయ్యావా !
రేపన్నది లేకుండా  యెదలో గాయం రేపావా!
నాపుట్టుక విలువంత మట్టిలో కలిపిన మమతవా!!

ఏముంది?

ఏముంది నీకు నాకు నడుమ?
తరిగిన మాటలు కరిగిన కలలు
చెదిరిన ఆశలు కదలని కలతలు
కూలిన కోటలు తగిలిన కోతలు
నిట్టూర్పు శ్వాసలు నిస్తేజపు నడకలు
నిన్ననే నిశిలో కలిసిన మనసులు
ఇంతకు మించి ప్రళయపు ఏకాంతం
మిగిల్చి మాయమయ్యావే నువ్వెక్కడ?

వెలకట్టలేని యువరాణి::

చిరుజల్లుల నగవుకు సరితూగు సిరులు ఎక్కడ?
మృదుకోమలి మోముకు సరిపోవు మల్లెలు ఎక్కడ?
సుకుమారి సోకుకు సరిసాటి సొగసు ఎక్కడ?
వయ్యారి సొంపుకు సరిపాటి మయూరి ఎక్కడ?
యువరాణి విలువకు వెలకట్టే కుబేరుడు ఎక్కడ?