వెలకట్టలేని యువరాణి::

చిరుజల్లుల నగవుకు సరితూగు సిరులు ఎక్కడ?
మృదుకోమలి మోముకు సరిపోవు మల్లెలు ఎక్కడ?
సుకుమారి సోకుకు సరిసాటి సొగసు ఎక్కడ?
వయ్యారి సొంపుకు సరిపాటి మయూరి ఎక్కడ?
యువరాణి విలువకు వెలకట్టే కుబేరుడు ఎక్కడ?

మాతృభాష

మాతృభాష రా ఇది! మృతభాష కాదిది!!
వెయ్యేండ్ల వైభవం ఇది! వెన్నభాష రా ఇది!!
"దేశభాషలందు తెలుగు లెస్స" అంటే
సరళం,సులభం అని రాయలోరి మాటది!
ఆంగ్ల పంకిల పంక్తులలోని ' లెస్స్ ' కాదిది!!

ఉచ్ఛరణలోని మధురం!
అలంకారాల అంకురం!
ఛలోక్తి ఛందోప్రయోగ కర్మాగారం!
యతిప్రాస పదమైత్రిల అనురాగం!
యాసప్రయాసల వైరుధ్య భేదగానం!

ఆంగ్ల అయ్యోరు బ్రౌన్ ఆస్వాదించిన  తాళపత్ర గ్రంధాలు!
తాళ్ళపాక అన్నమయ్య ఆలపించిన తేటతెనుగు గేయాలు!

దేశమంటే మట్టికాదు మనుజులని
నరుల కీర్తిని గుణించిన గురజాడ పాఠాలు!
పదండి ముందుకు పదండి త్రోసుకని
నరనరాల ఉత్తేజం నింపిన శ్రీశ్రీ రచనాస్త్రాలు!

ఇవి గదా మన సంస్కృతి!
మనః నమోస్తుతి త్రిలింగ భాషకు!
అట్టి తీయనైన నా తల్లి తెలుగు దేవేరికి ప్రణామాలు!!

గందరగోళం

ఎన్నికల వేళ,ఎన్ని కలలో;
ఓటరు జాతర మొదలు-మూడునెలల మునుపె;
బహిరంగ సభలు-బలప్రదర్శనలు;
వాగ్దానాలు-వాగ్వాదాలు;
సర్వేలు-సంప్రదింపులు;
గోడ మీద పిల్లులు- గుంటనక్కలు;
పార్టీ స్థాపనలు-ఫిరాయింపులు;
అభివృద్ది జపం చేస్తూ-అవకతవకలు;
అవినీతిపై పోరాటం అంటూ-దందాలు కబ్జా ఘనులకు టికెట్లు;
నిజాయితీగా నిలబడ్డ వారికేమో.. నిరుత్సాహపు ఇక్కట్లు;
క్రిమినల్ కేసులు విద్యార్హతలు చూడంది సామీ,
కులమతప్రాంతీయతల కండూతిని వదలందెహే ;
అంటుంటే వస్తున్న వ్యతిరేకతలో సగంలోసగం;
మీకోసం నిలబడుతున్న వారికి అందించరు ఆలంబన ;
బదులు నెగ్గరంటూ ఊరికి ముందే చేస్తారు అవహేళన;
జయాపజయాలు తప్ప ధర్మాధర్మాలు ,
తప్పొప్పుల తలంపులు తెలుసుకోని జనాలు;
ఇదందీ సంగతి - ఎన్నికల వేళ ;
గగ్గోలల గందరగోళం  !!

సిగ్గు సిగ్గు !!

సిగ్గు సిగ్గు !!
మిమ్ము ఎన్నుకున్న ప్రజల
పాలిట భారం మీరు!!
భారత సర్వోన్నత పార్లమెంట్ లో
కారాలు మిరియాలు చల్లి,
చేతి గాజులు విసిరి,
మైకులు విరగ్గొట్టి,
ఏం సాధిస్తున్నారు?
ప్రపంచం కళ్ళలో
వెధవల్ని చేస్తూ భారతాన్ని;
పరువులు పీకి పందుల వలె
నిస్సిగ్గుగా  తిరుగుతున్నారు.
ప్రజల అభిలాషలను
నెరవేర్చుటకు ఉన్న మీరు
ఆ ప్రజల ఆత్మగౌరవాన్ని
సమాధి కడతున్నారు.
పిచ్హాసుపత్రి లోనో పందులదొడ్డ్లోనో
ఉండాల్సిన నికృష్టులను ఎన్నుకున్న
ప్రజలను చూసి జాలేస్తుంది.
భారతీయునిగా గర్వభంగంతో
తలదించుకుంటున్నా; ఈ పిచ్చోల్ని
పరోక్షంగా పార్లమెంటుకు
పంపినందుకు సిగ్గుపడుతున్నా!!

మాయా ప్రపంచం

మాయా ప్రపంచం,మాయా ప్రపంచం
మూఢంలో మునిగెను ప్రపంచం
అంధత్వంలో ఆహ్లాదతను వెతుకుతూ,
ఆపై అఙ్ఞానాన్ని విస్తరిస్తూ,
మూసిన మెదళ్ళతో మాదే నిజం అంటూ,
మిగిలిందంతా కల్ల అనే భ్రాంతి మాయలో
మైమరపించి, సంగీతంలో లీనపరచి ,
ఆహ్వానించి ఎదుటవారిని
ఇంతా బతికిన బ్రతుకు తప్పనీ,
మేమే సత్యం మేమే నిత్యం ,
మీరు మమ్మనుసరించమనీ,
వ్యాకోచించాల్సిన వయస్సు వారిలో,
సంకుచిత అనర్ధభావాల-
విత్తులను నాటుతూ,
విస్మరిస్తూ విశ్వరూపాన్ని,
విశ్వాసాలతో బతుకీడిస్తూ,
మంచి చెడులు, నడవడికలతో
నిమిత్తం లేక కరుణ ఉండునని-
వాగ్దానం ఇస్తూ,ప్రేమ పేరున-
ప్రార్ధనతో సమస్తం సమసిపోవునని,
కరుణతో కల్మషం కుళ్ళు కడుగబడునని,
తప్పుల చేసే అవకాశం ఉంది,
పాపం మాత్రాం సాతాను సొంతం-
కాదు కర్తదని ,నమ్మబలుకుతూ
ఉచ్చులోకి దింపుతున్నది ,
డబ్బులు వెదజల్లుతూ,
మనసులను  మనుషులను మార్చమని,
మాయ చెప్పగా,
చేతన చుపిస్తుంది వెర్రి ప్రపంచం!!!

నాకేం కావాలో!!!

నాకేం కావాలో నాకే తెలియట్లేదు.
జీవితాన్ని ఇలా గందరగోళంతోనే ,నాకంటూ ఇది కావాలి అని
నిక్కచ్చిగా తెలుసుకునే లోపలే తెల్లారిపోయేలా ఉంది.
ఇందులో కాలు,అందులో చేయి,ఉంకోదాంట్లో మూతి పెడితే, మొత్తానికి మునిగిపోతాం.
ఈ ముక్క చిన్నప్పుడే అమ్మ చెప్పింది.
కాని ఇప్పుడు మటుకు చెప్పటం లేదు.
స్వతాహాగ నిర్ణయాలు తీసుకునే వయసొచ్చిందని ఉద్దేశం కాబోలు!
అసలు నాకేంటి, అమ్మానాన్న లే ఓ రకంగా గందరగోళం సృస్టిస్తున్నారు అని నిందను నెట్టేస్తున్నాను.
ఆశలెక్కువా,పీకకు ఏది పడతాదో తెల్సుకోలేకపోడం;
వెరసి వార్తాపత్రిక లో ఏది ఇస్తే దాని పట్టుకు వేలాడటం,
మనకు పుర్తిగా దేని గురించీ తేలీకపోడం ,అమాయకత్వం.
పక్కవాళ్ళను చూసి ,వాళ్ళ మాటలకు విలువను ఇచ్చి;మనకేది
నచ్చుతుందో, దేనికి మనం పనికొస్తామో తెల్సుకోటం లేదు.
ఒక గమ్యం అనేదే స్పష్టంగా నిర్దేసించుకోలేనప్పుడూ,
దాని కోసం పాటుపడటం,తెగించటం ఎలా సాధ్యపడుతుంది?
ఏది ఏమైనా ఒకటి రెండేళ్ళు పోయినా పర్లేదు;నాకిదే సరైంది;నేను ఇందుకోసమె పుట్టాను,
దీనికే పనికొస్తాను అని దృఢ నిశ్చయం చేసుకోవాలి.
జీవితం కోసం జీవితం లోని ఓ రెండేళ్ళు పోయినా పర్లేదు.
జీవిత లక్ష్యం కోసం కొన్ని పణం గా పెట్టలేనప్పుడు,
మనకి మనమే తృణప్రాయం ఐనప్పుడు,
భయాందోళనలతో ఎటూ పోలేక, సతమతమవ్తున్నప్పుడు,
భుజం తట్టే వాడులేకపోయినా,
బెరుకూ-బెంగా లేకుండా,
ఇది నిశ్చయం,
ఇది నాదే!
ఏదేమైనా కూడా; అని గట్టిగా
నాలో నేను చెప్పుకునేదెప్పుడో?
ఏంటో!రకరకాలుగా పుర్రెలో పురుగు తొళిచేస్తుంది.
విధానం తేల్చుకోలేక నాలో నేనే నాతో నేనే,వందల విధాలుగా
పొట్లాడుతున్నాను. తర్కానికీ,మనసుకీ,వయసుకీ,
తగ్గదేదో తెలీక,తికమకలో కాలాన్ని ఖూనీ చేస్తున్నాను అనే
అపరాధభావనతో ,క్షణక్షణం నరకం అనుభవిస్తూ బతుకీడుస్తున్నాను!!

యువతకు అందని రూపాయి

పడిపోతున్న రూపాయి విలువ...
విలువలు లేని వ్యవస్థల చలువ...
అడుగిడుతున్న ఆశల ఝరిలో..
ఎదురీదుతున్న ఆశయం స్మృతిలో..
సమాజప్రవేశం పూర్తికాకున్నా యువతను...
భయబ్బలప్రయోగ్రప్పరీక్షలోన..
తోసి అదఃపాతాళలోతుకు నెట్టినారు..


తొంభైదశకం తొలినాళ్ళలోనే..
తల్లిఒడిలోనే చంపెయ్యకుండా...
చదువులు పేర శాసించినారు...
శైశవాన్ని సమాధిచేసినారు..
ఎదిగిన వేళ అందివ్వక్కుండా ..
అవకాశాలు హరించినారు...

తయారీ పరిశ్రమకు తిలోదకాలిచ్చి..
దిగుమతి కర్మకు దిగజార్చినారు...
అన్నింటా విదేశిమయంతో..
అడుక్కుతినే వెసులుబాటిచ్చినారు..

స్వాతంత్ర్యపు అర్ధం బాహ్యమేనా?
చిత్తంలో లేనప్పుడు..విత్తు చిత్తేగా!!
యాంత్రిక జీవనపు బాటకు..యూదు దేశాల..
ఇం-ధన అవసరం ...పసిడి పిచ్చోళ్ళ
ద్రవ్యోల్బణ బరువు...తీసింది రూపాయి పరువు..